23 Mayıs 2020 Cumartesi

Ji Rojnivîskê



Nivîskarên Weşanxaneya Avesta di van rojên koronayî de ji berhemên xwe çend rûpelan dixwînin û weşanxane wan vîdeoyan li ser kanala xwe ya Youtubeê diweşîne. Meha borî, min jî ji rojnivîska xwe çend rûpel xwendibûn û bi kalîmbayê Polyushka Polye ya hespên çargavî tîne bîra min lêxistibû. 

21 Mayıs 2020 Perşembe

Felca Ahu Sağlam



Cara pêşî, di serê salên 2000î de min ji komputera zaroyên meta xwe bihîstibû, ji Winampa ku logoya wê zer lîsteya wê kesk bû.

Ew muzîka enstrumantal, dûre di televîzyonê de dema nûçe dihatin dramatîzekirin li ber guhên min ket çend caran .

Çaxa lîseyê, wexta ku min ji xwe re CDyek çêkirin da, min ew jî xist lîsteya xwe; lê min bi tenê navê muzîkê zanibû: ''Gülümcan''

Li gor rîwayetên wê demê, jinika ku ew muzîk çêkiribû felc bûbû û wekî din jî ne nav ne erê ne na, me tiştek li ser jîyana wê nizanibû.

Pir paşê, dema min ji Youtubeê şiîrên qirixên Dîyarbekir guhdar dikirin, ew muzîk derket pêş min tim.

Ma û min ji bîr kir ew muzîka ku ez dixistim fikaran.

Jîyana ku her roj hinekî din jê kêm dibe, îro ji min re da zanîn ku ya muzîk çêkiriye Ahu Sağlam e, û ''Gülümcan'' di ''Hüznün Kolları'' de bûye û ew album di sala 1998an de derketiye. 

20 Mayıs 2020 Çarşamba

Bi Saxî Tirb

Ne kanim bixwînim ne kanim binivîsim. Ne kanim temaşe bikim ne kanim guhdar bikim. Wer demeke werg î pûç î bêfayde ye ku car caran bo hebûna xwe dikevim şik û şubheyan. Vîrusa korona însên bi saxî dixe tirbê. 

12 Mayıs 2020 Salı

Dengdan

Pablo Neruda mealen dibêje ''Em şair hez nakin ku xwendevan bi tenê ji şiîreke me hez bikin û wê derxin pêş.'' Ê min ji şiîrên min, tewrî pir ''Bîrêmjar'' û ''Zulfên Zelîxayê'' hatin nas kirin û deng dan. ''Bîrêmjar'' şiîra min a pêşî bû, belkî loma hat naskirin. Di meşhûrbûna ''Zulfên Zelîxayê'' de jî bêguman tesîra xwendina Abdullah Koçal heye. 

8 Mayıs 2020 Cuma

Berî Havînê

Meriv bi rabirdûya xwe ji xwe re sîlehekê çêdike bo di siberojê de xwe pê biparêze; ew sîleh divê ti carî bi ti şiklî nekeve destên kesên din. 

12 Nisan 2020 Pazar

Şewba Albert Camus

albert camus

Wextekê min ji Albert Camus pir hez dikir. Gotinên wî yên niha jî bi min rast û xweş tên, li defter û profîlên min hebûn tim.

Înan Eroglu yê ku ew heyranîya min ya bo Albert Camus dizanibû, ji min re postkarteke bi portreya wî şandibû carekê.

Ma; min çend salan ji Albert Camus tiştek nexwend.

Îro di kovareke bi Tirkî de li gotinên Albert Camus yên ser şewbê rast hatim. Camus mealen dibêje ''Bi xêra şewbê meriv fehm dike ku dinya çi cîhekî bêmane ye..''

Li dora xwe, li kesên pê re didim û distinîm dinêrim, vîrusa korona hîn jî nekiriye ku milet ji xwe karûbarên fuzulî, nelazim dûr bixîne.

Ya min bi xwe li ser xwe bibêjim, ger ez bi silametî bifilitim ji vê şewbê, ezê mînîmalîstîya xwe qatek du qatên din zêdetir bikim. Naxwazim li cem min tiştên bêmane hebin li vê çi dinyaka pûç û vala.

1 Nisan 2020 Çarşamba

flashhilat - 15 Derket!

www.flashhilat.com
Hejmara 15an ya flashhilatê jiber talûkeyên vîrusa korona çêkirine bi awayekî dîjîtal derket. Hûn dikarin ji malpera fanzînê wê hejmarê deynin telefon, tablet û komputerên xwe. 

31 Mart 2020 Salı

FOTONIVÎSK - Coronahilat

*Hejmara Nîsanê ya flashhilatê wê jiber vîrusa korona bi navê ''coronahilat'' derkeve. Di Cotmeha 2019an de jî flashhilat jiber şerê di navbera hêzên Kurdan û Tirkan de bi navê ''flashava'' derketibû.

*Min çend royan li ser fotografîyê baş xwend lê ew çend saetên dawî xwendin bûye karekî giran li ber çavên min.

*Li ber eynikê sekinîbûm û piştî rojên eskerîyê cara pêşî dîsa bi xwe traş dibûm. Ji nişka ve, belkî bi tesîra acizîya jiber korona be, min got bila rûyê min biguhere û min simbêl berdan. Bavê min ku çito ez dîtim go ''Wanî fotografeke xwe bigire.'' Ez di fotografên bi simbêl de mîna mêrekî minasib im sankî.

26 Mart 2020 Perşembe

FOTONIVÎSK - Acizîya Bêmane

*Ketim galerîya telefona xwe. Bi sedan fotografên bêmane; bi taybetî yên ji Whatsappê hatine û çûne. Min hinek jê birin hinek man.

*Di van royên bi vîrusa korona de ne li rojnivîskan qeyd dikim tiştekî, ne li makîneya fotografan. Bira derbaz bin herin van royên xirab û venegerin li paş xwe nenêrin.

*Bo bîbînim çi heye çi tune ye, kî sax e kî miriye min Instagrama xwe vekir. Aciz bûm, heta hefteyekê ezê bigirim dîsa.

*Malpera flashhilat fanzînê gerek berî 1ê Nîsanê hazir be. Wê flashhilat - 15 jî di hefteya pêşî ya Nîsanê de derkeve.