6 Aralık 2017 Çarşamba

Dergûş û Bêşîg

şevek
Peyakî dilpêlewan e qaşo, sert î stûr e, lê ku dikeve hindur odê û çav li bêşigê xwe yî hesinî dikeve, hêsir xîşşşşşşt û hol dibin, dibin gol.

''Law va ez im îva me'' dibê û bêhemdî xwe digirî bi ser xwe de. Li şelt û doşeg û balgiyê dinêre û ew û xewên li baza û ranzayan herimîne nola fîlimeke bi çend sanîyeyan di ber çavên wî re derbas dibin.

Ji zirtebozîyê çûbû nivînên ortopedîk jî ceribandibûn. Tenê jî raketibû di wan de, li paşilekê pêçayî jî. Lê ti şev mîna yên di nêv nivînên li petela mala bavê wî de ne xweş bûn. 
Dadimale hêsiran û dinêre hinekî din li dora xwe. Dibîne va qenepeya qurşînî ye hatîye zora balgîyên sapî bibe. Perde; guherîye rengê wan, bes kulîlk hîn î li ser in.

Vedimirîne floresanê, qederekê li tawana tarî dinêre ku meraqek ji nişka ve dadiweşîne efsûna ku ode dagirtîye: ''Bêşîgê re bi Kurmancî dibêjin çi?''

Li ferhenga D. Îzolî dinêre, ''dergûş'' heye, yek jî ''landik'', lê ji ''beşik''a bi Tirkî re li wateya Kurmancî ''bêşîg'' tine. Wek ku zaroktîya wî li cîyekî şaş derbas bûye aciz dibe.

Nivîna ku bêrîya xew û şevên wê kiriye lê dibe marê reş. Her carê xwe bi hêlekê de teqle dike li ber bêşîga xwe. Radibe dermanên xwe dixwe, lê ofekufa wî nasekine.

Talîyê re tê êqil ku here ''beşik''ê ji ferhengên xwe yên herêmî bipirse. ''We berê ji bêşîgê re digo çi ma?'' dibê xewlêherimî. Du ferhengên ku yekê li ser 60'î xistiye, yekî li ser 70'yî bi hev re bi yekdengî dibên ''Bêşîîîîgg..''

''Dergûş'' dibê, ''win yek caran dibên ya jinik e bi dergûş e, dergûş yanî, yanî jinik bi bêşîg e?'' Her du ferheng bi hev re dikenin û îzah dikin: ''Dergûş, yanî mena xwe bebik.. Berê kesî nedigo bebik, jinên nû radibine dibên bebik..''

Vedigere odeyê, dergûşê ku peyakî dilpêlawan e qaşo, sert î stûr e. Floresanê vêdixe, li bêşîgê dinêre: ''Tehde min mede îşev'' dibê, ''ez jî tehde te nedim. Em dergûş û bêşîg tev li ber hev rakevin, nola wan şevên berê yên Kurmancî lê bê xema Kurmancî bi Kurmancî''

Çito ku ku floresanê vedimirîne xurexur bi dergûşê dikeve, bawer nake bi guhên xwe, ditirse û dike ku floresanê vêxe lê nikare ji şûna xwe bilive. Ji hestîyên wî qirçeqirç tê û hêdî hêdî dibin hesin dikevin dirûvê bêşîgekê.

Bi qarewar xwe ji xew diavêje, di xwêdanê de bûye av e: ''Min di xewnên Kurmancî no, ka xanim û xatûnên xweşik!''

Berfanbar 2017, Ofîs - Dîyarbekir

6 yorum:

  1. Keçeke xalis muxlis kurmancî ji te ra divê. Acîlînden.

    YanıtlaSil
    Yanıtlar
    1. Wekî din...

      PETEL çi ye gelo?

      Sil
    2. Merheba Adsız,

      Bibore jiber bersiva dereng. Petel.. Ew nivîn û balîf û doşeg û şelt hemî li ser hev dibin petel.. Mesela ji yekî re dibêje, ''Here petela mala filankes binêre, 20-30 balgi, 30-40 mînder hene.. Welllllêeêê..'' :) Hez û hurmet.

      Sil
  2. Omero, hevala min dibéje "Mehdik" ji bo dergûş é.. ji bo pitik/bebikan jî dibéji "Hicik" û tîpa 'h' ji qiriké derdixe.. ji bo paçén pé dest û piyén pitikan giré didin jî dibéjin "Daspirînik"

    YanıtlaSil
    Yanıtlar
    1. Adsiz,

      Ji kîjan herêmî yî nizanim, tu ferhengeke nû hazir bike heyran :)

      Sil

Related Posts with Thumbnails