29 Aralık 2017 Cuma

Gulên Guhên Min - 2017

spas
Sal bi sal xwezîyên me bi par û pêrar zêde dibin. Lê de dinya ye îşte, çito ku ji Siltan Silêman re û ji serwer û serdaran re nema, ji bloger û begleran re jî ewê nemîne. 

A baş, meriv hesretan di zikê xwe de nêlîne û bi qasî fersend rê didin dem û dewrana xwe têr û tije derbaz bike.

Jiber ku - her çiqas zorê didim xwe jî - wer ji gerê û ji temaşekirina fîlman hez nakim, bo têrûtijebûnê di destê min de xwendina kitêban û guhdarkirina muzîkê dimîne.


Dema dilê min dişkê û ji dinê sar dibim, ji xwendina kitêban hinekî dûr dikevim, lê muzik di şînê de jî di şahîyê de jî li guhê min e û em qet terka hevdu nakin. 

Ji çûkîya min ve guhê min li ser muzîka şerqî ye. Car caran ji lîsteyên muzikê yên cîhanê yên xerbî jî guhdar dikim, bes dibînim ku ji iptis iptisê hîs çênabin bo min, loma guh jê berdidim. 

Min ji playlîsta xwe lîsteya albumên ku min di 2017'an de zêde guhdar kirine çêkir. Rêzkirina wan ne li gor formata ji destpêkê yan li dawîyê ya herî baş e; sepana fotografê wisa li nav hev xist û ez jî wisa belav dikim. Wekî din belkî min bi sedan stranên single guhdar kirine lê wek album bo min ew derdikevin pêş: 

Kerem Gerdenzeri
gerdenzer
Kerem Gerdenzerî, di sala 2016'an de stranên koma rockê ya efsane Koma Wetan, bi enstrumentalî derxist. Ji wê komê rockê favorîya min ''Hesen Bira'' ye. Di albuma enstrumantal de ew tine, jiber nebûna enstrumentala wê stranê pir li ber ketim ya rast lê dîsa jî di modên xebatê de, hazirkirina hin dosyeyan yan meşa di navbera Ofîs û Sûrê de min ew albuma îsal pir guhdar kir. 

alatirkî
Gava muzika Tirkan ya kevn guhdar dikim nizam ji çi ye xwe li bin Pira Galatayê ya li Stenbolê hîs dikim her tim û wek ku li wir pêlên behrê sêr dikim û araq e li ber devê min e. Albuma Ala Turca, ji hunermedên cihê tomarên di navbera 1925 û 1955'an de ne. Kemanî û udîyan tehmeke xweş xistine albumê. Min Theodoros Demirtzioglou bi Kasap Misak Ağıdı nas kiribû û huzna dengê wî li ruhê xwe dagirtibû, lê di vê albumê de ji dengê wî Asmalarin Ntallere heye ku kêfê dide meriv û serê meriv pê xweş dibe; surprîzeke baş bû bo min. 

Celal Çiriş
rihayî
Ji zikrên Neqşîbendîyan û Rufaîyan hez dikim û ku fersend bi dest min dikeve li Sirûc û Riha tevlî wan zikran dibim. Car caran li Diyarbekirê bêrîya wê atmosfera efsunî dikim; murîdên bi cizbê dikevin, dengê êl-defîyê, û heyyy û heyyên bi dengê şêx li zikrê zikrê dibin... Özbek Kasetçilikê, ji dengê Qazanci Bedîh, Celal Çiriş, M. Hanif Polat îlahîyên Riha qeyd kirine: ''Ben beni qeybettîm Baxdat êlinde, bana dêrler kimsin, Qadîrîyem ben, Seyîd Ehmed Rufaî'nin köesîyem ben..''

Iran
keybanû
Sîma Bîna ji 2008'an vir ve kebanîya ber dilê min e û heta niha ti kesî şûna wê negirtiye. Min ew bi ''Banucan''ê wê nas kiribû û ez dîrekt bûbûm heyranekî wê. Albumên wê bi taybetî di şevtarîyan de guhdar dikim. Îsal min ji albumên herî zêde ''Çîçekên Çolê'' guhdar kiriye. Di vê albumê de ''Dilê Şeyda'' heye, her ku ez guhdar dikim pê serxweş dibim. 

Back to Anatolia
veger
Efkar Ensemble, çend salên berê li ser forumekê min dît. Tenê jiber ku qapax û navê albumê bala min kişandibû min album guhdar kir. ''Back to Anatolia'' di 2005'an de derketiye. Bi qasî zanim wekî din ti albuma vê komê tune. Kî ne çi ne nizanim, lê ''Al Yazma Zeybegi'', ''Fincanın Etrafi'' yên di vê albumê de kirine ku ez îsal jî vê albumê bidim ber guhên xwe. 

Hozan Serhad
hozan
Murat Esen, bi navê wî yê ku em nas dikin, Hozan Serhad.. Xeyalên rehmetî jî hebûn qey di ciwanîya wî de. Jiber sedemên ku jixwe her Kurd bi awayekî baş dizane, her cara ku vê albumê guhdar dikim, nizanim ji kû dikevim derdên welêt û ji kû derdikevim. Albuma Murat Esen di sala 1987'an de derketîye. Wer xuya ye ez dikim di sala 2018'an de jî vê albumê guhdar kim û bêdeng bêjim, ''lo welato lo''

Rayir
poşman û rayir
Kerem Sevinç wê dema hanê mizgînîya albumeke nû da. Ji 2015'an vir ve her heftê herî kêm carekê ''DEJ''a wî guhdar dikim û hîn jî jê têr nebûme. Di serê sêrî de ji vê albumê favorîya min ''Poşman'' bû, rêya ro bi ro ber mirinê dare îsal ez qulibandim ser ''Rayir''ê. Her cara ku vê stranê guhdar dikim, ne şeytan lê stran dibê ''dest ji her tiştî berde, biavêje pişta xwe çenteyekî û derkeve here, bi kê derê de darî here, bes here..'' Dil e qey, disekinim li şûna xwe û girîyê min tê, ne dibên cebarê hêsirên çavan tune.

Tara Jaff
Li gor min di muzika me ya Kurdî de, yek ji baştirîn hunermandên me Cemîl Qoçgîrî ye, lê heyf ku bi qasî dibînim pir nayê nas kirin û guhdar kirin. Hinek stranên hêla Sêwasê bi xêra wî hatine parastin û ketine guhên me. Ez jiber ji dîftonga wî ya ji ''xwe''yê çûye û peyv kiriye ''xe'' jî ekstra ji Cemîl Qoçgirî  hez dikim; çinku em jî li Sirûcê dibên ''xa'': Baran barî gulê gulê hûr hûr lê kir, gul û sosin were gulê rengê ''xe'' vekir. Wî û Tara Jaffê albumeke ji her wextê re dare hazir kirine di sala 2015'an de. Di ber re dengê Aynur Doğanê jî tê bihîstin. Haaa, Tara Jaffê ''Av''a Feqîyê Teyran jî gotiye, dipirsim ji xwe heta kengî vê albumê bi eşq û muhbet guhdar kim, tew nizzam ku. 

hemî
Mercan Dede jî îsal bi hemî albumên xwe wer li ber guhên min bû. Bi taybetî albuma wî ya bi navê Dünya. Ew albuma ku di sala 2013'an de derketîye bi navê Gündoğumu û Günbatımı du volume in; ser hilatina royê û çûyîna wê ya ava hatiye hazir kirin. Min gelek şevan Gündoğumu guhdar kir û her carê jî pê fehm kir ku boş û betal e dinya Mercan Dede şîretên sofîyan li muzikên xwe yên new age direşîne: ''Her tişt bo hatina talîyê ye, ew dinya jî ne bo mayînê ye ku cîhê şewitînê ye..'' 

bîr
Bi Herba Sûrîyê re muzika erebî hat Sirûc û Rihayê. Êdî li def û dawetan, miletê me yî Kurmanc jî li ber muzîka Erebî govendê digerîne. Ez dibêm qey tesîra wê ye, îsal min hinekî li muzîka Erebî nihêrî. Berê min qet guhdar nekiribû Erebî hema bêje. Asmahan dîvayeke muzîka Erebî ye û di 26 salîya xwe de di qezayeke trafîkê ya bi şik û şubhe de jîyana xwe ji dest daye. Min ji ''Elward''a wê hez kir û gava min guhdar dikir min digot qey ez li şevên Beyrûdê me.


Pervin Çakar
nav
Gava meriv li sûka Dîyarbekirê yekî bisekînine bêje ''Fikri Kutlay kî ye?'', normal e bêje ''Welle min qet nebihîstiye'' Lê ne mimkun e ku yekî/e piçekî guh dabe ser muzika Kurdî, navê Koma Amed seh nekiribe. Fikri Kutlay endamekî Koma Amed e û keda wî di ''Dergûş''ê de, ku albumeke nemir e û her dem tê guhdar kirin, heye. Piştî Koma Amed belav dibe, Kutlay bi Çar Newa re dewam kiriye. Dostên Fikri Kutlay, di 30 salîya hunermendîya wî de stranên wî gotine. Min ji vê albumê herî zêde ji dengê Pervîn Çakarê ''Ruhê Min Teyr E'' hez kir û dubare dubare bi taybetî bi şev guhdar kir.

Diyarbekiri Hokin
bajarî
Onnik Dinkjian di sala 2015'an de albumeke bi navê ''Diyarbekiri Hokin'' derxistîye. Album bi peşreveke meriv dibe ber kevirên reş ên Sûrê destpê dike û stranên din jî ku ziman neyê fehm kirin jî pir nas in; çinku bi şiklekî bi Kurmancî û bi Tirkî li ber guhên me ketine. Ermenî, Kurd û Tirk bi dizîya muzikê hevdu - na ew bû hevsê - tawanbar dikin her. Gava min album cara pêşî guhdar kir, ez serxweş bûm û ew nîqaşên ser dizîyê giş li ber çavên min bûn heftûheştên pûç û vala. Kesên meraqa wan li melodrama nostaljîyê heye, divê berê maseya araqê hazir kin û wisa albumê vekin.


Ayfer Düzdaş
reş
Şînên Qoçgiriyê bi nav û deng in. Li ser YouTube min çend videoyên jinên wan ên reş girêdane û distrên guhdar kiribûn û canê min gurzgurzî bûbû li ber gotinên wan. Ayfer Düzdaşê li şînan deng qeyd kiriye û albuma Şînên Qoçgiriyê di sala 2012'an de derxistiye. Min album îsal nû dît, li ber ketim ku min ewqas dereng guhdar kir ew şînên xweser yên Qoçgiriyê. Di wan şînan de Kurmancî û Tirkî di nav hev de ne. Her şînek ji şînekê girantir e. Navê şînekê Cerahpaşa ye, meriv dikare veke û ji xwe re tenê bi ser xwe de bigirî. Dilo Dilo jî di bîra min de maye. Vê albumê zû bi zû venakim guhdar nakim, çinku newêrim.

Sen Orda Yoksun
evîn
Albumên Gokselê ku çi wext derdikevin, straneke wê pêşî li rê di dolmişekê de dibihîsim. Albuma wê ya dawî ''Sen Orda Yoksun'' zêde zêde li ber guhê min bû, par û pêrar. Îsal jî min albumeke wê ya berê, Bende Bi' Aşk Var, di sala 2012'an de derketîye, jiber ''Yalnız Kuş'' û ''Acıyor'' zêde zêde guhdar kir. Demekê ez rûniştim ku ''Yalnız Kuş'' û ''Acıyor''ê wergerînim Kurmancî, paşê min dest jê berda û deng rakir talîyê berguhk kuta guhên xwe û serê xwe jî kuta bin betanîyê û heta şefeqê her du stran guhdar kirin. Nizanim, baş e ku min wernegerandin.


Bekçi Bakır
Jêderê muzika berê yê Rihayê Mukim Tahir e. Ser ''Araban Gazel'' û ''Elleri Pamuk'' û bo çendekên din hunermand wî wek çavkanî raber dikin. Herkes jiber îltîfatên xweş yên di ''Elleri Pamuk'' de dibêjin qey ew stran jibo jinekê hatiye gotin, lê li gor hin Rihalîyan ew bo ''Xêreddîn Abê'' hatiye nivîsîn ku dibêjin mêrekî pir î çeleng î şebab bûye. Albuma ku Kalan Muzikê di sala 2004'an de derxistiye, kir ku ez hin stranên Bekçi Bakır û Kel Hamza yên li derekê peyda nabin guhdar bikim. Pirtir gava li Riha û Sirûcê min guhdar kir ew albuma hosteyên muzîka Rihayê.


Mahzuniye Saygı
rêz
Albumên tribute di van salên dawî de li Tirkî zêde bûne. Hinek hunermend tên ba hevdu bo bîranîn û rêzdarîyê stranên hunermendekî rehmetî bûyî yan sax dibêjin. Albuma dawî ya tribute Mahzuni'ye Saygı bû. Ji berê de ji stranên Aşık Mahzuni hez dikim. Di vê albumê de Cem Adrian, ''Dumanlı Dumanlı'' xweş gotiye. A ecêb jî bo min, ''Çeşmi Siyahım'' dueta Ahmet Aslan û Demet Akalın bû. Teoman jî ''Boşu Boşuna'' gotiye, jixwe ji bilî wê ti stranên din yên Aşık Mahzuni li wî nedihat.

Berfanbar 2017, Ofîs - Dîyarbekir

6 yorum:

  1. Arşîvek baş bû destxweş. Ji zikrê heta Gokselê, gulên guhên te bûye wek teyrê tawûsê:)

    Kevanekek biçûk ji bo Fikrî Kutlay; hem doktor hem muzîsyen û hem jî hemşoya min Fikrî Kutlay di vê albûma xwe de,helbesta "Yokuş Yol'a"ya Turgut Uyar beste kirye û Hüsnü Arkan jî deng daye. Li gor hin muzîsyenan bestekirina vê helbestê gelkî zehmet e lê Kutlay bi awayekî serkeftî beste kirye. Jêgirtinek ji helbestê

    güllerin bedeninden dikenlerini teker teker koparırsan

    dikenleri kopardığın yerler teker teker kanar



    muş - tatvan yolunda güllere ve devlete inanırsan

    eşkıyalar kanar kötü donatımlı askerler kanar


    YanıtlaSil
    Yanıtlar
    1. Roza Xanim,

      Spas bo van agahîyan. Ji arşîvê zêdetir pêşnîyazên naçîzane ne; wek lîsteya salê. Bes giş ne albumên îsal in. Xwedê saxî û silametîyê bide ez ê ji sala pêş re hewil bidim ku lîsteya albumên 2018'an çêbikim.

      Min pir hez nekir ji strana wê helbesta Turgut Uyar. Rêzdar Lal Laleş ew helbesta wergerandîye Kurmancî, xwezila Kutlay jibo wê wergerê hewil bida tiştek çêbikira. Belkî ceribandiye nebûye jî, nizanim.

      Sil
  2. Te ji dil û can pîroz dikim, kronîkeke muzîkê ya pir xweş û mikemel e. Tu pir tiştan zanî yaho ! Di her tiliyeke te da marîfetek heye...

    YanıtlaSil
    Yanıtlar
    1. Apê Zinar,

      Spas, te ez kêfxweş kirim. Ji dest min çi tê dikim dinivîsim û wek cenabê te ez jî dixwazim ciwanên li dû me tên jê feyzekê, sûdekê werbigirin û tiştekî lê zêde bikin. Ew mîratên dijîtal in, em dêlînin li van deran.

      Sil
  3. İsal ji tene ne hat qimil qimil qimilo
    Qimil xwar û dawi hat ha ho ji desté qimilo wiy
    Zar û zéç tev birçi man qimil qimil qimilo
    Xela bi serme da hat ha ho ji desté qimilo wiy

    Hat qimil lé rojhilat qimil qimil qimilo
    Genim xwar û dawi hat ha ho ji desté qimilo wiy
    Min xwesti buk zavabim qimil qimil qimilo
    Qelené buké der ne hat ha ho ji desté qimilo wiy

    Hemed weri ber bi baye qimil qimil qimilo
    Qimil hate bi refaye ha ho ji desté qimilo wiy
    Tev de li genim belabun qimil qimil qimilo
    Genim xarin ma kaye ha ho ji desté qimilo wiy

    wiy lo apo lo kokimo wiyde apo lo pişt xaro
    wiy lo apo Hemed wéri lo ber bi baye
    E de qimil hate lo bi refaye
    Wiyde genim xari lo mayi kaye
    Were apo wé çax bi haléme lo feqiraye

    YanıtlaSil
    Yanıtlar
    1. Adsız,

      Bêje heyran em qimil çi bikin? Spas.

      Sil

Related Posts with Thumbnails