27 Aralık 2017 Çarşamba

Jibîrkirina Tirkî

Blogên Kurdî
ber bi wan şevan
Bi rojên dawî yên salê re çêkirina puxte û panaromayeke salê edet e.

Çi bernameyên rojeva siyasî yên televîzyonan, çi jî malperan nûçe, futbol û magazînê, giş ji giregirên dinê heta hunermandan kê di wê salê de çi gotiye çi negotiye, di çend deqîqeyan bi wêne û dîmenan tînin bîra meriv û jê derbaz dibin diçin.

Îro Çarşemê, min li ser içsesdefteri nivîseke derbarê mehên 2017'an xwend û jiber safî, pakî, şexsîbûn û kinbûna wê ya tam di tehmê de min pir eciband.

Li ser Facebookê ne aktîf im nola berê, lê dîsa jî min got ez wê nivîsê paragrafekê pê xim û li ser hesabê xwe biweşînim. Nivîs bi Tirkî bû û min jî hewil da ez tiştekî bi Tirkî li hev bînim.

Ebowwwwww.. Ez şok bûm, herikbarîya min ya bi zimanê Tirkî hetîkîbû û ez nû pê dihisiyam. Min pênce teqle dan xwe û ancax pênc hevok nivîsîn. Tesîra Tirkî ya li ser min helîyabû çûbû. Ji kêfan hindik mabû ez li hindur ji xwe re tenê rabûma û min li dora xwe govend bigeranda.

Rossel Jacoby di nivîseke xwe de, ku nav Dawîya Utopyayê ye, daye zanîn ku pir-kulturî bêmane ye. Zygmunt Bauman di ser wî re dibêje ku însanên xwendî nizanin li ser rewşa îro tiştekî bibêjin û çareserîyekê bibînin; loma diçin û tên dibêjin ''jiyana pirçandî'' ku ew jî îdeolojîyeke dawîya îdeolojîyê ye.

Di ser van her du feylesofan re ez jî dixwazim bêjim ku her çiqas bi zorê hatibe elimandin jî ez bi zanebûna Tirkî kêfxweş im, lê ji duzimanîya bi Tirkî-Kurdî pir aciz im û naxwazim Tirkî di jiyana min de zora Kurdî bibe.

Min nehêjmart lê van dawîyan herhal min ji Kurdî pirtir bi zimanê Tirkî kitêb xwendin, bes jiber ku ew du meh in ez li ser blogê bi awayekî aktîf bi Kurmancî dinivîsim, zimanê min vebû û bezand bêwest.

Loma jî, bloga min tu yî xemrevîna min û li ber dilê min xweşiktir î ji bilûra Celadet Alî Bedirxan. Te ku ez ji Diyarbekirê gêhandim şevên Kurmancî yên mêrxasên Deşta Sirûcê! Li min xeyal bû çend sal in lê êdî wê bimîne heta hetayê layezal!

Berfanbar 2017, Ofîs - Dîyarbekir

6 yorum:

  1. Xweş sûret e ewa jor lê ez herî zêde hej sûretekî te dikim ku tê de tu bi zarokan re dibezî. Zêde hej wî sûretî dikim. Ger bêjin Emerê Sirûcî kî ye, ez ê bêjim ka li wî sûretî binerin. Ev pênc salê min î talî, qey mi deh kitêbên tirkî xwendine. Û ev salek bêtir e bi xwe'd dihisim ku tirkiya mi xera dibe. Kêfxweş im a rast lew tirka bi zorê em elimandin zimanê xwe. Û layezal ??

    YanıtlaSil
    Yanıtlar
    1. Yusivê Sûrethez,

      Ew sûretê tu behs dikî di sala 2013'an de li Sirûcê hatiye girtin. Bi rastî jî min bi zaroyan re dilîst, dûra ez bi fotografê hisiyam.

      Ku em werin ser layezalê, di dîwanên şairên me yên berê de derbas dibe, yanî tiştê êdî wenda nabe, ebedî ye û eşkere ye.

      Sil
  2. Di jiyana xwe de tişte herî baş a min xwendina nivîsén te ne Omer, ez xwe di vi blogé de kurdî hîs dikim, dema dinya li seré min de té hev ez xwe di vi blogé de dibînim û dibéjim: raste heye jiyanek kurdî û ev jî bes é min e ji bo jiyîné.. mala te ava tirkiya me wenda be :)

    YanıtlaSil
    Yanıtlar
    1. Adsız,

      Te bi rastî barê min hîn girantir kir.. ''Di jiyana xwe tiştê herî baş a min xwendina nivîsên te ne Omer..'' Tiştên xweşiktir bibîbîne ya.. Bes baş e ku tu jî xwe li vir Kurdî hîs dikî.

      Demekê hin hevalan israr kir ku ez nivîsên xwe yên bi Tirkî jî li vê blogê bar bikim. Min yek dudu lê bar kirin, paşê ez poşman bûm min rakirin. Niha dibêjim rind e min rakirine ew nivîsên Tirkî. Çi wext têm ser bloga xwe, diçim wan şevên Kurmancî û kêfî min xweş dibe.

      Spas bo vê şiroveya rindik, dem û dewrana te her û her xweş û geş be.

      Sil
  3. Îca heyran me go em ma'dé te xweş bikîn te go barem giran dibe, lé bizanibe bi nivîsén te ez pir pir dilgeş im, ica bar giran bû tişt nabe dema ketî tengasiyé deng bike ez é werim alîkarî, dibe??

    YanıtlaSil
    Yanıtlar
    1. Adız,

      Na na, bi şiroveya te kêfî min xweş bû. Spas, bawer bike min nizanibû kêfa xwendevanekî/ê ewqas ji nivîsên li vê blogê re tê. Te bask bi min xistin ez firandim ezmanan. Te bi şiroveya xwe ya alîkarîya herî xweşik kir.

      Her tim dibêjim, ew blog bi qasî ya min e ya xwendevanên sadiq yên vê blogê ye jî. Xuya ye, tu jî tim li van deran çerx dibî wekî min. Milkê te ye, loma silav, hez û hurmetên ji milkê dil.

      Sil

Related Posts with Thumbnails