9 Ocak 2018 Salı

Lîsteyên Pirtûkakurdî û İki Dil Bir Aşk

Sobe
Malpera firotina kitêbên ser Kurdan, pirtûkakurdî, bi qasî hefteyeke berê lîsteyên kitêbên ku di 2017'an de herî zêde hatine firotan belav kir.

Pirtukakurdî, her çiqas jiber navê xwe tenê firotina kitêbên bi zimanê Kurdî tîne bîra meriv jî, di eslê xwe de tiştekî mîna ''pirtûkênkurdan'' e û jiber ku pirtir li bakurê welêt populer e, bi kitêbên bi Kurdî û yên bi Tirkî yên ser Kurdan hatine nivîsîn debara xwe dike.


Loma, meriv dikare muşterîyên malperê yên ne-Kurd bide hêlekê, û di ser piranî û giranîya xerîdarên ku Kurd in, lîsteyên pirtûkakurdî bi pirsa ''Kurd çi dixwînin?'' bixwîne.

Seher
giştîcan
Jiber ku xwendevanekî ku bala wî li ser xwendina bi Kurmancî û Tirkî me - hinek xwendevanên ku bi Kurdî dixwînin bi tundî dijî xwendina kitêbên bi Tirkî ne - min li lîsteya giştî ya pirtûkakurdî dûr û dirêj nihêrî, bes tenê li ser sê kitêbên pêşî fikirîm.

Seher ya Selahattîn Demîrtaş kitêba çîrokan bû û min bi meraqekê kitêb danîbû ber xwe. Kobanî ya Jan Dost roman bû û piştî qendandina wê ez li dû hin pirs û bersivan ketibûm. Lê kitêba sisêyan? İki Dil Bir Aşk ya Azad Penaber..  Jiber hin tehn û tinazên li sosyal medyayê yên li ser wê kitêbê, bêyî ku zanibin wekî din tiştekî li ser berhemê, min xwe ji xwendina wê kitêbê ''xefirandibû''

Ne rexneyên giran yên ser Demîrtaş, ne nefreta mezin ya dijî Jan Dost, li çavên min nebûbûn kelem û rê li ber xwendina ''Seher'' û ''Kobanî''yê negirtibûn, lê ew tehn û tinazên li hin profîlên sosyal medyayê bi hêzeke çito kiribûn ku ez rûyê xwe ji heqîyê dagerînim û bêyî ku bixwînim qerfên xwe bi ''İki Dil Bir Aşk''ê bikim!

Min şûrê rexneyê da ser stûyê xwe û got ''Eger tu careke din bêyî ku tiştekî bixwînî bikevî bin tesîra rexneya desthilatdar ezê sêrî te qut kim!'' Rexneya desthilatdar dibêjim; yanî ku ''ew'' bêyî ku sebeban bibêjin behsa ''gewre''bûnê bikin berhemê re şor nabe êdî, ku ''ew'' bêsedem ne-ecibandina xwe nîşan bidin, divê hûn jî rûnin hema nola wan qerfên xwe bi berhemê;.. ne bi berhemê jî tew, bi kesên berhemê diecibînin, bikin!

Belkî şaş bim, bi qasî zanim pirtûkakurdî sê sal in van lîsteyan belav dike û her cara ez vedikim li lîsteyan dinêrim, nivîskar û berhemên wan wek partîyên ku ketine hilbijartinan dibînim. Gel ji xwe re ji kîjanî hez dike, wî hildibijêre. Divê meriv kesên ne ji partîya xwe bi ''bêfehmî''yê tawanbar neke û nebêje ''nezanên edebîyatê'' ne filan.

Gava kirasek bi şiklê xwe kiras be kiras e; meriv nikare ji wê kirasê re bêje ''ne kiras e'', lê jiber caw û rengê wê meriv dikare bêje ''ne ti kiras e'' Rewşenbîrên me li şûna ku rexneyên xwe bidin ser ''ne ti kitêb e'', tînin xwe dispêrin ''ne kitêb e'' ku li gor min ji berhemê pirtir li kesên wê berhemê hez dikin heqaretê dikin. Ew rexne ye, lê ne ti rexne ye yanî.

Axir, piştî ku lîste belav bû, bi şûrê min bi destê xwe danî ser stûyê xwe, wisa bi tirsa ku ez hema serî xwe bilîvînim dê şûr stûyê min bibire, stûxwar, ez çûm min ''İki Dil Bir Aşk'' ya Azad Penaber kirî wê roya han.

İki Dil Bir Aşk
civakî
Ez li kafeyekê rûniştim û min kitêbên dê wê rojê min lê binêrîyana danîn ser maseyê. Xanimeke zarşêrîn ya li maseya kêlekê bi ''Mamoste tu çi dixwînî?'', - me hevdu nas nedikir, hebûna sê kitêbên Kurdî li ser maseyê kiribû ku ez bibim mamoste - nêzî min bû û hîn berî ez bersivê bidim, kitêb xistin destên xwe û yek bi yek li nav û nivîskarên wan nihêrî. ''Giregir'' hema bi şûnda danîn ser maseyê, lê İki Dil Bir Aşk wa bi qirpandina çavan bi awayekî îşwekar di destên xwe de hişt, lê min dît ku rûyê min jiber kitêbê bêhemdî min sor û mor dibe: ''Ma min va kitaba dixwend lan?'' 


Azad Penaber helbestên ku pirtir ''lîselîyên partîli'' dikarin jê hez bikin nivîsîne. Hema bêje di hemî helbestên wî de eşq û şoreşgerî li nav hev ketine û ''jargona partîyê'' ji her dera helbestan difûre.

Penaber, hinek helbestên xwe îthafî kesên wek Hamdullah Öğe, Dilek Doğan, ku hatibûn kuştin, kirine. Min bala xwe dayê, kesên ku qerfên xwe bi helbestên Penaber kirine ''di vê majara hassas de'' çi bigir nexwestine serî xwe biêşînin, û bi qasî ji dest wan hatiye dûrî wan helbestan sekinîne.

Estetîka ku ez lê digerim, dixwazim tune bû di helbestên Azad Penaber de. Ku min bi şev kitêba wî qedand, ez fikirîm, min got ez herim kitêba wî li pêş dersxaneyên li nêzî mala min deynim. Dibe ku lîselîyekî/ê ji xwe re ji yarika/ê xwe re bişanda. Paşê min go ku keçikek kitêbê rake û jiber navê min yê li ser rûpeleke kitêbê, wê wek ''teklîf''ekê bihesibîne, ezê rezîl û ruswa bibim û min dev jê fikrê berda.

İki Dil Bir Aşk
duzimanî
Berî çend salan min koleksîyoneke Mihemed Şarman, ku li konferansên wêjeyî dibêje ''kesên Şahê Bedo guhdar nakin bila kitêbên min nexwînin'', dîtibû. Şarmên kitêbên helbestan yên ku zû bi zû li her derê peyda nabin berhev dikir û navê wê koleksîyona kitêban jî ''Gelmeşeya Geljêhezdike'' danîbû.

Serê sibê min li ser kitêbê ''Va kitêba di destê te de bo koleksîyona taybet ya helbestan, yan koleksîyona tabyet ya bêhempa, bêhemdem, bêxem, bêînûşemîûyekşem Mihemed Şarman ji Diyarbekirê ber bi Wanê rêketîye'' û da kargoyê.

ji koleksîyonê
Şarman ku kargo gêhiştê, ji min re mesajeke kêfxweşîyê nivîsî. Li gor gotina wî, yek ji dîyarîyên herî xweş yên jîyana wî min jê re şandibû û heta bêje kitêba ku li koleksîyona wî zêde bûbû dikaribû berhemek jî ji zikê wî derxista.

Min kitêb şandibû ez jê filîtîbûm lê pirsekê serê min dixurand: Divê meriv ji lîsteya Kurdan ya ku ''çîrokên bi Tirkî, romaneke bi Kurmancî, helbestên bi Tirkî'', ''Selahattin Demirtaş, Jan Dost û Azad Penaber'' têde bû bigihêşta kîjan gotinê?

Di sala 2009'an de Serokê Venezuela Hugo Chavez,  ''Latin Amerika'nın Kesik Damarları'' ya Eduardo Galeano dîyarî dabû Serokê Amerîka Barack Obama. Kitêba ku di sala 1971'an de hatibû çap kirin, ji lîsteya ku têde li rêza 50,000'î, erê li pênce hezarî bû tavilê çûbû rêza duduyan sekinîbû û li ser Amazonê qedîyabû.

Nizanim, kîjan çito rast e, nizanim.

Çile 2018, Riha

Hiç yorum yok:

Yorum Gönder

Related Posts with Thumbnails