14 Şubat 2018 Çarşamba

Abbas Ahmed û Gotinên Stranan

Barana Tirsê
pişta min nema
Mîna hinek kitêban, gerek li yek albuman jî meriv paşê vegere û wan ji nû ve guhdar bike. Herhal jiber guherîna ruhê meriv e, gotinên stranan wek ku bi salan re mor û şorên nû li xwe xistibin, bi awayekî din tên guhên meriv. 

Seba Kurmancên nola  min, mesele ne tenê ruh e; parîyekî jî meseleya zimên e ku mîna zemqekê bi me ve zeliqîye: Kurmancîya min ya wexta ez xortekî lîselî bûm û muzîka Hejaro ya Abbas Ahmed kiribû dengê telefona xwe, têra fehmkirina gotinên wê stranê giş nedikir; loma ez îro dengê wî bi rengekî din dibihîsim. Çinku sewt sabît be jî, bi ferasetê re difertile dibe tiştekî din bi min.

De bêsiûdîya Abbas Ahmed e ku gelek kes stranên wî yên xweser î orîjinal bi ser berhemên Ciwan Haco ve dihesibînin. Îro ro jî gava meriv navê straneke Abbas Ahmed li YouTubeê dinivîse, vîdeoyên bi wêneyên Ciwan Haco derdikevin. 

Belkî heyranê Ciwan Haco bixeyîdin, lê ez dikarim ji dil, bi rihetî bibêjim ku estetîka muzîka Abbas Ahmed di ser ya Ciwan Haco re ye. Ne pisporê muzîkê me, bes ne devê min, lê guhên min yên bi salan xwe dane ber her duyan dibêjin vê yekê.

Li gor daneyên Spotifyê, Deynek albuna pêşî ya Abbas Ahmed e û di sala 1998'an de derketîye. Li dû wê, Barana Tirsê derketîye di sala 2000'î de, dûre di 2004'an de Mêvana Xewnê û herî dawî di sala 2007'an de jî Bi Tenê.

Tirşikvanan ser Abbas Ahmed hinek agahîyên din jî dane; min xêncî guhdarkirina van albumên wî, ne derbarê wî tiştek temaşe kiriye ne jî xwendiye. Eyb e meriv bêje, heta niha min ti hevpeyvînên wî jî nedîtine li derekê û piştî min çar albumên wî careke din guhdar kirin, min derdekî din li xwe zêde kir: Nedîtina gotinên stranên Abbas Ahmed!

Spotify bi hevkarîya Geniusê, bo hin muzikên Îngilizî, dema ew lêdikevin, gotinên wan û çîrokên albumê jî di ber re tîne ser ekrana telefonê. Niha, di van şertan de em û dîtina gotinên stranên Kurmancî li ser Spotifyê ne xewna şevan e ne jî ya royan; nabe. 

Bo gotinên stranên Kurmancî ez pirtir li malpera  ronibaran dinêrim. Di wir de her çiqas gotinên bi sedan stranên Kurmancî hene jî bi min pir hindik tên. Mesela, çar albumên Abbas Ahmed hene û min di vê malperê de tenê gotinên çar stranên wî dîtin. 

Meriv zimên û devokan çiqas baş zanibe jî jiber dengê ji gewrîyan yan giranîya guhan yek peyvên stranan meriv tam fehm nake û her ku meriv stranê guhdar dike, ew dibe kuçek meraq li ser dilê meriv rûdine. 

Gênc malperên şiîran vedikin û bo wan aplîkasyonan çêdikin. Eger taqeta û wexta wan bi min re hebûya minê xwe bide ber malpereke gotinên stranên Kurmancî vekira. 

Çi wext li ser Googleê lêgerînê dikim, tim bi Kurmancîyeke şaş ji malperên Tirkî gotin derdikevin pêş min ku pişta meriv bi wan gotinan jî pir ne qewîn e. 

Axir, min dikira bigota Abbas Ahmed hunermendekî mezin e û bi me malpereke mezin ya gotinên stranan lazim e, lê nizam çira min wa dirêj kir? Nizanim.


Ha, bo kesên piştî xwendina vê nivîsê dixwazin Abbas Ahmed guhdar bikin jî ez favorî straneke xwe li vir deynim, bêsebr î.. 

4 yorum:

  1. Ez fedî dikim bibêjim, lê ev cara pêşî ye bi xêrê vê nivîsa te, min navê Abbas Ahmed bihîst û li straneke wî guhdarî kir.
    Ji bo wî û Ciwan Haco miqayese bikim nuha nikanim tiştekî bibêjim. Lê ji nuha û pê da ezê tim Abbas Ahmed guhdar bikim.
    Spas ji bo vê nivîsê.
    Bi qasî rexnegirîya edebîyatê, tu rexnegirekî muzîkê jî. Û him jî rexnegirekî pir baş î. Heger tu li Swêd bûya bnuha tu milyoner bû.

    YanıtlaSil
    Yanıtlar
    1. Gerek tu ji albumên wî temamê "Deynek”ê guhdar bikî, ruhê te xort e, tam li goreyî te ye. Spas bo van gotinên xweş, bira ez blogerekî baş bim, wekî din tiştek ne lazim.

      Sil
    2. Xwezî hemû blogerên kurd wek te bûna. Tu çend tiştên baş î, ne bloger tenê.
      Min berê jî got, di her tiliyeke te da marîfetek heye.
      Ma hûn hemû xwişk û bira wiha jîr û xwedî mezîyet in ya tu û Îbrab tenê wiha xwedî qabîlîyet in?

      Sil
    3. Têm destî te Apo, me li ber destê mezinên mîna te nan xwar, ew bû para me. De îcar însanek ku ji me faydê digire, dibîne em kêfxweş dibin. Li ser şîretên diya xwe û şorên bavê xwe diçin em tên. Xwedê meriv ji qeza, bela star ke, û bike fenomenekî keda salan :) Amîn.

      Sil

Related Posts with Thumbnails