Spotifyê Xebera Xêrê Da: Êdî Kurdî Nas Dike

25ê Temûzê 2025, În

Îro dinê ne îşê îşan germ bû li Riha, te digo qey ar bi dinê ketiye, alawî ji dinê radibe.

Ez ku damîşe germê dibim û di kelegermê da jî heta pir ne mecbûr be ji odeya xwe dernakevim, min dî nabe, min çû xwe avêt ber bextê klîmaya li salonê. 

Dîya min û xwişka min a mezin Cemîle li min nihêrin û gotin ‘’Go ti jî dibêy dinê germ e dêmeg dinê êdî dişewite’’ 

‘’Bira dinê ne, bira Spotify bişewite’’ min digo di dilê xwe da. Ketibûm Spotifyê min dîsa bê hêvî û bê heyecan li eyarên zimên dinêrî ku çi bibînim, şok! 

Spotifya jiber qebûlnekirina zimanê Kurdî kezeba min reş kiribû êdî anîbû Kurdî li lîsta zimanan zêde kiribû. 


Di vê kelegerma kafir da nola ku anîn satilek ava honik li min kirin. Şa û şên, rû bi kêf dev li kên firîyam erş û ezmanan, mîna xewnan bû.

Çinku, podcasterên din pir nizanim, min bi xwe sê salan bi Spotifyê ra şer kir ku Kurdî nas bike û talîya talî westa min li ber tiştekî girt, kêrî tiştekî hat. 

Êdî hatibûm ber hedê protestokirina Spotifyê: Van demên dawî min ji Enstîtuya Kurdî ya Lozanê ra û ji Qehwe û Felsefe Podcastê ra nivîsîbû ku em ser vê meselê tiştekî bikin bi hevdu ra û dengê podcastên bi Kurdî bilind bikin. 

Camêran bi kubarî cewab dan û gotin em dikarin bi hevdu ra tevdîrekê bigerînin. Qey îstixbarata Spotifyê bi tevdîra me hisiya û mecbûr gavek avêt. 

Tesîra PodNewsê jî heye ez dibêjim. Min çend caran ji vê malpera bi Îngilizî re nivîsî ku ser vê meselê binivîsin. Wan jî digot ‘’me bi Spotiyê ra xeber daye em li benda gavên guherînê ne.’’

Bo arşîvê bo tarîxê qeyd em bibêjin: Spotifyê di talîya Temûza 2025an re Kurdîya podcastên mîna Perxudres Podcastê qebûl kir, ziman nas kir. 

Spasîya guhdarên Perxudres Podcastê, ew guhdarên sadiq û samîmî dikim ku di royên teng û tarî da jî em tenê nehiştin û kirin ku em bi cesaret û cidîyet dewam bikin di podcastê da. 

Dîsa spasîyeka xususî jî bo wan destekçîyên Perxudres Podcastê yên li ser Patreonê ku bi xêra wan barê me parîyekî sivik dibe û em dibînin li dinê hene hîn dostên kultûr, sanat û edebîyatê. 

Û spasîyek bo Omer Faruk Baran ku ser Perxudres Podcastê dibêje ‘’mal e, mekteb e, memleket e, ku ne kultûr, sanat û edebîyat be însan qet e..’’ 

Bi xatirê we.

PIRR TÊNE XWENDIN

Doğan Kılıç Wenda û Wenda Roja Newe

Resim
Kurdên Tirkîyê piştî bêdengîya demdirêj a li dû şikestinên Şêx Seîd û Seyîd Riza serê salên 1960î bi parçek serbestî ra nola ku hêdî hêdî hatibin ser hemd û hişên xwe bi kovar û kitaban, bi gazeteyan jinûve hatine xanê.  Wan salên li dû derbeya eskerî bi rêberîya Musa Anter, Deng , bi ya Edip Karahan, Dicle-Fırat û bi ya Doğan Kılıç jî Roja Newe derketiye.  Ser Deng û Musa Anter, ser Dicle-Fırat û Edip Karahan barek belge hene îro di destê me da, lê ser Doğan Kılıç û Roja Newe malumat heta van salên dawî têm kêm diman û hema bêje ti kesî tiştek nizanibû.  Roja Newe ya Doğan Kılıç di tarîxa Tirkîyê da gazeteya pêşî ye ku bi Kurdî û Tirkî derketiye. Wan salên 1960î di gazeteyên din da jî nivîsên bi Kurdî derketine, lê îbareya Roja Newe xusûsî ew e, gazeteya bi Kurdî û Tirkî.  Gazeteya tek hejmarek derketî û nola Doğan Kılıç wenda sala 2019an li  Milli Kütüphane  ya Enqerê bi xebatên Mutlu Can hat dîtin û li dîjîtalê hat barkirin.  Roja Newe ya sala 1...
DEWAMÊ BIXWÎNE >>>

Bi Halên Tercûmekirinê Hewalên Şiîrekê

Resim
Di karên edebî da îşê tewr bi talûke tercûmekirina şiîran e herhal.  Çinku dema tercûmeya şiîrekê ji zimanê wê ya orîjînal çêdibe jiber şiîrbûnê tercûman bixwaze nexwaze mehne dişikê û rê li ber şaşîyên mezin vedibe.  Loma ez kitabên duzimanî yên şiîran tu dibêjî qey ne jibo xwendina şiîran, lê jibo dîtîna wan şaşîyan dixwînim. Hele hele kitaba duzimanî bi Tirkî û Kurmancî be, û zimanê wê yê tercûme Kurmancî be ji min ra mesele ji şiîrê derdikeve, dibe fersendeka ferhengî ku ez pê peyvên xwe kontrol bikim.  Bi van fikran li  Hal  a Sabri Erdem dinêrim çend ro ne. Kitaba wî şairê Berferatî, ku ji salên 1990î vir va li Almanya ye, Yaqob Tilermenî yê bi çîrok û romanên xwe tê naskirin çerxe Kurmancî kiriye. Dixwînim, dixwînim û di şiîreka kitabê da disekinim, dûr û dirêj didim ber hevdu Kurmancî û Tirkîya wê. uçamadı laz uşağı  gotiye Sabri Erdem,  nefiriya laz uşaxî  gotiye Yaqob Tilermenî, ez bûma minê jî bigota  laz uşaxî  dibêm, min jî ...
DEWAMÊ BIXWÎNE >>>

Mektûba Guhdar D. û Rêya Xewê

Resim
Çi gava xewa min nayê radibim makîneya firaqan dişixulînim. Dengê avê, di makîneyê da dengê guherîna cîye avê, carna dengê ketina firaqekê aramîyê didin min. Îşev jî wer dibe, xew nakeve çavên min. Radibim derdora xwe top dikim, dibêjim qene nebe piçek din jî dibetilim. Qedeh, tebax, kase.. Di her odeyekê da tiştek, derim û têm, derim û têm, û makîne tijî dibe. Pêlî qumçeya makîneyê dikim û mêze dikim ku îşareta parlatici yê sor dibe, îşareta ji bo biriqandina firaqan.  Oxxx dibêm ‘‘Îşekî din jî heye heta ku makîneyê bidim şixulandin, ezê piçek din jî biwestim û rehettir razim.’’ Derim ji bo biriqandina firaqan deterjanê tînim, dikim hundirê makîneyê, qapaxê digirim û didim şixulandin. Ji dengê ewil da, ew dengê gava makîne dest pê dike û avê digire, ez sakîn dibim. Derim balîfeka nerm û betanîyeka tenik tinîm, hema li nêzî makîneyê li ser qoltixê xwe dirêj dikim. Dengê avê te, di nav makîneyê de dizivire, û hêdî hêdî çavên min têne girtin; dengê avê tê, makîne avê davêje ser firaq...
DEWAMÊ BIXWÎNE >>>