Mektûba Mamoste Hudaî û Çerxa Kaînatê
Ez domanê mensûbê aîleya Elewî-Kurdê Çewlîgî ya. Malesef zêdeyî ez bi Tirkî bîya pîl.
Amnanî 4 aşme Karêr dewa Darebî, mezra Axakû de bi Kurdî bî, payîz, zimistan û bihar zî merkezê Çewlîg de seba wendene bi Tirkî bî.
Keyê ma de zêde Tirkî ameynê qesî kerdene. Maye û pîyê mi ra zêde, 9 wayanê mi dormeleyê mi de bî. Zafanê wayê mi şîbî mektebê Tirkan, seba ney zî tesîrê Tirkî keyê de giran bî. Zazakî û Kurmancî zî her daîm telewe de bî.
Karêr de cemxane de reyberê ma Sêwas ra ameynê û Kurmanc bî. Pîr, reyberê ma yê Sêwasic gulbangê xo zafeyî Kurmancî cinitêne.
Zaten, gulbangê Kurdî Meraş ra bige hetano Efrîn, Efrîn ra bige hetano Erdexan, Erdexan ra bige hetano Sêwas, heme yew ê.
Wexto ke maye û pîyê mi kilaman vatenê yan zî lornayêne zafeyî Kurmancî vatenê û lornayêne. Veyvê ma de Zazakî ra zêde Kurmancî kilamî ameynê vatêne. Tirkî zî kewtêne mîyan tabî.
Karêr, 21 dewî Kurd Elewî, eşîra Xormekan ra murekeb o. Ney dewan ra 16 bi Zazakî, 5 dewe bi Kurmancî qal kenî.
Seranê mabeynê 1988-1994 Mêrsîn de qezaya Mezitli de ez şîya mekteb, İçel Anadolu Lisesi. Lîse him Mersîn him zî Tirkîya de serkewte bî. A semed ra wendekarê zengînê tirkan zaf bî na mekteb de, Kurd nêbî, no zî hetê adaptasyon de zehmetîye da mi.
Xalê mi Sebrî yew şoreşgero namdar bî Rîya Azadî de. Yew roj mi girewt berd buroya Kovara Deng a Mêrsinî. Sera 1992 buroya Kovara Deng de mi yewîn kitabê Zazakî û Kurmancî dî. Mehmet Emin Bozarslan ra Mem û Zîn û yew kitabê Mihemed Malmisanijî, "Dimilî, Kirdî, Zazakî" ser yew broşur bî.
Mêrsîn de, kitabxaneya dewlet de mi belgeyê Kurdolojî ey Mehmet Bayrak wendbî. Ney kitabî ney kitabxane de vînayîş surprîz bî. Çunkî mi maqaleyê Mehmet Bayrakî Kovara Deng de wendenê, kitabxaneya resmî de dîyayena kitaba ey mi şa kerdbî.
Tayê wextan bi erebeyê mi Bro rê rayan de domantîya mi ey Çewlîgî û xortanîya mi ey Mêrsînî, bi heyecanê weşî kuweno vîra mi.
Bagajê Bro de ferhengê Roşan Lezgini -bi fînansê şîrketa Binpınar, şîrketa awê, ameyî girewtîş- ma 28 bajar gerayî seba dersê ziwanê Kurdî. Her bajar de ma zaf kesî nas kerd û mi ferhengê Zazakî da înan ke ney umrê xo de yewîn defa kitabê Kurdî girewtî.
Îmanê mi serê welatê mi yo. Her can, kemer, dar, hewr, luye, manga, adir, awe, va, çem, koyî, siterkî, aşme, tîje, mar û milawin yanê heme kaînat çerx dano zerê mi de. Xizirê kal, Xizirê serê keleg û gemîyan, Xizirê serê astorê boze her daîm hetê mi de ro. Ez û Bro bi duayan û gulbangan rayan de ya seba Kurdî.
Ezîm û sebir Ellah.
Mamoste Hudaî
